حوزہ نیوز ایجنسی کی رپورٹ کے مطابق، کولکتہ/ مغربی بنگال کے فعال مبلغ اور اسلامک اسکالر مولانا ڈاکٹر رضوان السلام خان نے اپنے ایک بیان میں کہا کہ ترکی، سعودی عرب، پاکستان، مصر اور خلیجی ممالک یہ خوش فہمی نہ پالیں کہ اگر آج ایران کو نشانہ بنایا گیا ہے یا اسے محاصرے میں لینے کی کوشش کی جا رہی ہے تو یہ معاملہ یہیں ختم ہو جائے گا۔ انہوں نے خبردار کیا کہ خدا کی قسم، اگر آج نہیں تو کل دیگر ممالک کی باری بھی آ سکتی ہے اور کوئی بھی ملک عالمی سازشوں سے خود کو محفوظ نہیں رکھ سکے گا۔
مولانا ڈاکٹر رضوان السلام خان نے کہا کہ موجودہ حالات اس بات کا تقاضا کرتے ہیں کہ مسلم دنیا ہوش کے ناخن لے اور باہمی اختلافات، مسلکی و سیاسی نزاعات کو بالائے طاق رکھ کر متحد ہو جائے۔ انہوں نے زور دیتے ہوئے کہا کہ آج ایران کے شانہ بشانہ کھڑا ہونا دراصل پوری امتِ مسلمہ اور دنیا کے تمام آزاد انسانوں کی آزادی، عزت اور مستقبل کے دفاع کے مترادف ہے۔
انہوں نے مسلم حکمرانوں اور عوام سے اپیل کی کہ وہ وقتی مفادات سے بالاتر ہو کر مشترکہ حکمتِ عملی اختیار کریں اور استعماری قوتوں کے عزائم کو ناکام بنانے کے لیے اتحاد و یکجہتی کا مظاہرہ کریں، کیونکہ انتشار اور خاموشی دشمن کے مقاصد کو مزید تقویت دیتی ہے۔
آپ کا تبصرہ